Okwi;Yanga mkija taifa Octoba 12 mmeumia

 

EMMANUEL Okwi amejiaminisha kwamba ana uhakika wa kuishinda Yanga kisheria na kuvaa jezi ya Simba kuanzia Septemba 20 siku utakapoanza msimu mpya wa Ligi Kuu Bara.

Hiyo ni tisa tu, kumi ni kwamba ametoa kauli moja mbaya kwa Yanga akisema: “Oktoba 12 Yanga msije Uwanja wa Taifa, nitawamaliza.”

Simba na Yanga zitakutana siku hiyo katika uwanja huo jijini Dar es Salaam katika mechi ya kwanza ya msimu mpya na Mganda huyo amesema yatawakuta kama ya mwaka 2012.

Mwaka huo katika mechi ya ligi Simba ilishinda mabao 5-0 ambapo Okwi alifunga mabao mawili, mengine yalifungwa na kipa Juma Kaseja, Felix Sunzu na Patrick Mafisango (marehemu). Lakini Okwi ndiye aliyesababisha yote.

Okwi amesajiliwa Simba kwa mkataba wa miezi sita huku Yanga ikiwashtaki Simba na Okwi Shirikisho la Soka la Tanzania (TFF) kwa madai ya kukiuka taratibu za usajili ikisema Okwi bado ni mchezaji wake na inataka kulipwa fidia ya Dola 500,000 (Sh 825 milioni).

Akizungumza na Mwanaspoti kwenye kambi ya Mnyama mjini hapa, Okwi alisema: “Yanga wasubiri mabao mengine na inaweza kuwa zaidi ya yale matano, najua wanachotaka kunifanyia Yanga na walianza muda mrefu, lakini nataka kuwaambia kwamba nitacheza Simba na sitafungiwa popote.

“Nasubiri siku ya kwenda kusikiliza hiyo kesi na wasipoangalia watanilipa wao fedha ambazo wanataka mimi niwalipe, kwani wao ndio waliovunja mkataba wangu.

“Kwanza nilikumbana na adhabu ya kufungiwa, mimi ningechezaje na sababu hiyo pia walitumia kama kigezo cha kutonilipa mishahara yangu na mkataba wangu unasema wasiponilipa mishahara yangu ya miezi mitatu wanakuwa wamevunja mkataba, ngoja tusubiri tuone.

“Kauli za Yanga zinanifanya niwe na hamu kubwa ya kucheza juu ya kiwango na kufunga mabao mengi, msimu ujao wasipoangalia watarudia kumbukumbu ya kufungwa goli nyingi sana.”

Kocha wa Simba, Patrick Phiri alisema: “Hili suala lipo chini ya viongozi wa klabu na tayari limefika TFF ambacho ni chombo kikubwa cha soka hapa nchini, lakini naweza kusema tu kwa upande wangu kwamba si vyema mchezaji akakaa nje muda mrefu bila kucheza kwani kiwango chake kitafifia.

“Wachezaji wengi wana umri mdogo, haipendezi kabisa kuona kijana mwenye miaka 25 hawezi tena kucheza. Siku hizi wachezaji hawadumu mchezoni zaidi ya miaka mitano, naamini suala la Okwi litashughulikiwa na kumalizika ili acheze.

“Okwi ni mchezaji mzuri sana labda tu ujana unamsumbua, nimezungumza naye naamini amenielewa kwani ana uwezo mkubwa wa kucheza soka, nataka ndani ya timu wachezaji wote wawe na nidhamu sawa.
 “Mchezaji asipokuwa na nidhamu kwangu hawezi kupata nafasi ya kucheza.”