Sekeseke la Okwi;TFF yaivimbia Yanga

Mshambuliaji mpya wa Simba, Emmanuel Okwi akisalimiana na kocha wa timu hiyo Patrick Phiri kabla ya kuanza mazoezi kwenye Uwanja wa Aman, Zanzibar juzi. Picha na Doris Maliyaga. 

Dar es Salaam. Siku moja baada ya Mwenyekiti wa Yanga, Yusuph Manji kulipa Shirikisho la Soka Tanzania (TFF) siku saba kumaliza suala la mshambuliaji wao Emmanuel Okwi aliyejiunga Simba, Shirikisho hilo limesema Yanga wasiwaamrishe kwani wanafanya kazi kwa mujibu wa katiba na kanuni zao.

Katibu Mkuu wa TFF, Celestine Mwesigwa aliliambia gazeti hili jana kuwa kauli ya Yanga ni kichekesho kwa vile hawafanyi kazi kwa kuamrishwa na Yanga na kuwataka watulie hadi hapo Kamati ya Sheria na Haki za Wachezaji itakapokaa kujadili suala hilo.

“Tunafanya kazi kwa mujibu wa kanuni na taratibu, hatufanyi kazi kwa kuamrishwa na mtu mmoja na isitoshe siyo suala lao tu ambalo linatakiwa litolewe ufumbuzi, yapo mengi,” alisema Mwesigwa.

Juzi Manji alitoa siku saba kwa TFF kushughulikia haraka suala lao na Okwi na kwamba zikimalizika siku saba bila ya kupatiwa ufumbuzi atalifikisha suala hilo Fifa na ikibidi CAS.

Hata hivyo nakala ambayo gazeti hili linayo ambayo imesainiwa na Katibu Mkuu wa TFF kwenda Yanga ya Agosti 26 ikiijulisha Kamati ya Sheria na Hadhi za Wachezaji chini ya mwanasheria Richard Sinamtwa kukutana na uongozi wa Yanga kati ya Septemba 6 au 8 ili kutatua suala la Yanga na mshambuliaji wao Emmanuel Okwi ambaye amejiunga na Simba.

Katika madai ya Yanga ambayo wamewasilisha TFF ni pamoja na Okwi kuisababishia klabu hiyo hasara ya dola 200,000 (zaidi ya Sh300 milioni), klabu hiyo kupoteza ubingwa wa Ligi Kuu Tanzania Bara baada ya Okwi kukacha kucheza mechi sita za ligi na mbili zikiwa za kimataifa msimu uliopita. Pia, Yanga wanataka Okwi arudishe fedha zote za mshahara ambazo walikuwa wakimlipa. Yanga ilikuwa ikimlipa mshambuliaji huyo dola 4,000 kwa mwezi sawa na Sh 6.5 milioni.

Tayari Yanga imeshapeleka mashtaka yao TFF ikitaka Okwi afungiwe kujihusisha na masuala ya soka nchini pamoja na kuishtaki klabu ya Simba kwa kutangaza kumsajili Okwi na kumvalisha jezi ya Simba wakati wakijua ana mkataba wa miaka miwili na klabu hiyo ya Jangwani.

Akizungumzia suala hilo, Mwenyekiti wa Kamati ya Usajili ya Simba, Zakaria Hans Pope alisema, “Manji aache kuweweseka, akumbuke Yanga walimsajili Okwi akiwa na mkataba na Etoile du Sahel na unaisha mwaka 2015 hilo wanalijua wazi, lakini wakamsajili.”

“Sisi tulichofanya ni kumsaidia Okwi asipoteze kipaji chake kama sheria za FIFA zinavyosema mchezaji hawezi kukaa nje ya uwanja kwa miezi sita, tumemstiri hadi hapo matatizo yake na Yanga yatakapomalizika.

“Kwanza nashangaa sana, Yanga wamemuacha huku roho inawauma, kama una matatizo na mkeo unatakiwa umwambie aende kwa mama yake akapumzike kisha wewe unajipima je, unaweza kuishi bila mke. Kama unaweza unatoa talaka, sasa wao wametoa talaka huku mke wanamtaka si kichekesho hicho roho zinauma. Okwi sasa hivi ni mali ya mwingine siyo mali yao tena,” alisema Hans Pope.